Markaðssetning og vefurinn

Það reynist sumum vefstjórum erfitt að sinna markaðsmálum samhliða vefstjórastörfum. Þar spilar inn í að vefstjórar eru gjarnan “introvertar” og markaðsstarf krefst þess að þeir séu “extrovertar”. Ég held að það gildi um stóran hluta vefstéttarinnar að hún vill vinna sín verk í friði og kallar ekki á athygli. En öðru máli gildir um vefinn. Hann kallar á athygli. Hvað er til ráða?

Þú getur litið á vefinn þinn eins og búðarglugga. Ef þú opnar nýja verslun þá geturðu búist við að nokkrir ráfi inn til þín en þeir verða aldrei margir nema þú komir versluninni á framfæri. Það sama gildir um vefinn. Þú verður stöðugt að minna á hann til að fá heimsóknir.

Hinum kvíðafulla vefstjóra til huggunar þá vek ég athygli á að markaðsstarf fyrir vefinn fer að stórum hluta fram fyrir utan kastljósið. Þó mikilvægt sé að fanga athygli fjölmiðla, koma sér á framfæri með fyrirlestrum og kynningum, stækka tengslanetið og stunda ákveðna sölumennsku þá eru aðrir þættir veigameiri í markaðsstarfi fyrir vefinn.

Fjórir megin þættir eru að mínu mati mikilvægastir í að koma vef á framfæri:

• Regluleg skrif fyrir vefinn með bloggi og uppfærslum á efni eða það sem er nefnt í dag efnismarkaðssetning.
• Leitarvélabestun, sem er náskyld efnimarkaðssetningu. Vefstjóri þarf að vaka stöðugt yfir virkni leitarvéla, besta vefinn fyrir notendur og þá um leið fyrir leitarvélar.
• Samfélagsmiðlar gegna lykilhlutverki í að koma efni á vef í dreifingu, lestur og kynningu. Auglýsingar á þessum miðlum eru markvissar og tiltölulega ódýrar.
• Netauglýsingar eins og Google Ads eru mikilvægar til að koma efni á vef á framfæri, ekki síst í byrjun meðan sýnileiki í leitarvélum er lítill og skynsamlegt er að kaupa birtingu fyrir ákveðin leitarorð.

Aðrir þættir eins og að koma vefnum að í vefborðum, auglýsingum í öðrum miðlum, kynningarefni og nafnspjöldum skipta einnig máli en eru að öllu jöfnu ekki jafn skynsöm fjárfesting. Ein heilsíðuauglýsing í dagblaði getur t.d. jafnast á við mánaðarvinnu í þrotlausum skrifum fyrir vefinn í kostnaði og fyrir sambærilega fjárhæð í netauglýsingum gætirðu náð mörgum sinnum til allra íslensku þjóðarinnar!

4 mikilvæg atriði áður en haldið er af stað

1. Skilgreina markhópinn. Áður en þú leggur út í markaðsstarf fyrir vefinn þinn þá þarftu að vera með það á hreinu hver markhópurinn þinn er og hvar sé auðveldast að nálgast hann.
2. Skilgreina markmiðin. Þú þarft að vera viss um hverju þú vilt ná út úr verkefninu. Ætlarðu að fjölga heimsóknum, skráningum á póstlista, auka sölu eða annað?
3. Hver sér um markaðsstarfið? Næsta skref er að skilgreina hver muni taka að sér markaðsstarfið. Hvað hefurðu mikið til umráða og geturðu falið einhverjum öðrum að sinna markaðssetningu? Í íslensku samhengi er það líklega vefstjórinn sjálfur sem þarf að sinna þessu verkefni (eins og svo mörgum öðrum).
4. Mæla árangurinn. Loks þarftu að tryggja að þú getir mælt árangurinn af markaðsstarfinu. Vertu visss um að vefborðar, auglýsingar á netinu og efni sem þú birtir á vefnum hafi á bak við sig mælingarkóða sem þú getur fylgst með.

Nýjar reglur í markaðsmálum

Leiðtogar í markaðsmálum eins og Seth Godin (Purple Cow, Permission Marketing) og David Meerman Scott (New Rules of Marketing and PR) hafa lengi talað fyrir nýrri nálgun í markaðssetningu og nauðsyn þess fyrir markaðsfólk að tileinka sér ný vinnubrögð og byrja á að taka vefinn alvarlega. Það eru nefnilega komnar nýjar reglur.

Það er liðin tíð að markaðssetning á netinu snúist um að gera borða sem reyna að gabba notendur inn á vefinn. Hún snýst mun frekar um að þekkja orðin sem mögulegir kaupendur nota og setja í gang litlar herferðir t.d. á Facebook eða Google sem fær fólk inn á vefi og kemur með efni sem mætir væntingum þeirra.

Á vefnum þarf að vera áreiðanlegt og vel skrifað efni sem upplýsir væntanlegan viðskiptavin en truflar hann ekki. Efni á góðum vef er verðmætt og frumlegt í samanburði við markaðsskilaboð sem sjást á svo mörgum vefjum sem eru almenn og eiga að höfða til allra.

Tímasetning skiptir höfuðmáli

Það kannast örugglega margir við að ljómandi gott efni, færsla eða grein hafi ekki náð neinni dreifingu en annað efni sem hefði mátt halda að væri ekki jafn eftirsóknarvert fer á flug. Munurinn getur legið í hvaða dag og hvenær dagsins efnið fór út.

Justin Jackson hefur náð eftirtektarverðum árangri í sínum greinaskrifum og mikilli útbreiðslu m.a. með færslunni This is a web page. Hann nefnir að tímasetning sé lykilatriði og gefur eftirfarandi leiðbeiningar:

1. Gefið út á morgnana. Það fyrsta sem fólk gerir á morgnana er að skoða tölvupóstinn, samfélagsmiðla og fréttavefi.
2. Taktu mið af öðru sem er að gerast. Ekki gefa út efni á sama tíma og einhver stórviðburður er í gangi sem þinn markhópur hefur áhuga á.
3. Hvað er að gerast í þínu nærumhverfi? Verstu snögg(ur) til og skrifaðu um efni sem er í hringiðunni, t.d. á samfélagsmiðlum eða fréttum. Þannig nærðu að hamra heitt járn.

Mér hefur reynst best að gefa út greinar á sunnudögum þannig að áskrifendur póstlistans fái þær í býtið á mánudegi. Einnig hefur mér fundist best að vekja athygli á greinum á Facebook og Twitter á kvöldin, eftir að börnin eru sofnuð. Þá virðist minn markhópur vera duglegur að lesa og fylgjast með. Einnig hef ég reynt að stíla inn á að skrifa um efni sem er í deiglunni. Gerði t.d. úttekt á vefjum stjórnmálaflokkanna vorið 2013 og sú grein er önnur mest lesna greinin sem ég hef birt á vefnum. Það var ekki síst að þakka umfjöllun á mbl.is sem var sömuleiðis mjög jákvætt fyrir stöðu vefsins í leitarvélum.